موسوعة قصائد الشاعر سعد علوش

ابنك البار
ياقلبي اللي ثعا فيك ابنك البـار
ماخربك بس ماعادك بصالـح
يزل وتألف لزلاته اعـذار
وتقدره قدر عبدالله و فالـح
أنا أشهد إنك كبير فعالم صغـار
وانا أشهد إنك عن التقصير جالـح
وانأ أشهد انه غبي وضعيف و(تكرمون)
من قاس قدر المشايخ بالمشالـح
لو ما الوجيه لنوايا الناس معيـار
ماشفت وجه(ن) يشع و وجه كالـح
ياقلب هذا عصر جاحد و غـدار
مافيه حب الفديع و طيب شالـح
قنّن محبتك والبوّار بـوّار
لو كان تعطيه شهد ؟ يقـول مالـح
مادمت على شفا حفره من النـار
درء المفاسد ولا جلب المصالح
=
أفضل طرق
أفضل طرق عيش الحياه بسعـادهـ
هو أنك تعيش الحياه بسعادهـ
أنت أنعكاس لفكرتك يعنـي
أن كنت حزين ؟ صار الحزن و الهم عادهـ
وأن كنت دايم مبتسم و متفائـل
كسبتها مع السعاده عبادهـ
ماطوّل العمر القصير التوتـر
يطوّل العمر القصير الارادهـ
تفكيرك فـ بكره مظره ليومـك
وبكره بتفكيرك فـ بعده نكادهـ
عش في حدود اليوم وأفرح له اليـوم
واختار طلعاته و لبسه وزادهـ
=

الأشجار
تهب الريح والا ماتهب الريح يالاشجـار
أنا لازلت أشوفك أثمن الاشياء وأعلاهـا
لأنك تفرزين الأكسجين العذب والأثمـار
وحنا نحول إفرازك خبائث وانتحاشاهـا
ياكبر الفرق من قعر الجحود لقمة الإيثـار
وياكثر أشياء نعرفها ولا نعرف شمعناهـا
كليناك .. ولبسناك .. وجلسناك .. وشعلنا النـار
يافضحي كم خذينا عمرها ولا شكرناهـا
أنا آسف عن الحطّاب .. والحمّال .. والنجّـار
أنا آسف على كل الخطايا اللي خطيناهـا
أنا آسف بقلب الشاعر اللي ممتلي أزهـار
يقيس الكائنات بفعلها ماهو بأسماهـا
خلقنا الله نكمل بعضنا فالكون والصرصـار؟
أكيد أن له فوائد بس حنا ماعرفناهـا
يجوز انه مفيد أكثر من الثرثار والغـدار
ومن كمّ النساء اللي تفاخرها بـ اعظاهـا
يـ ابن آدم علاما الكبر والتكبير والأكبـار
ترى أجدادك تحت هالأرض هاذي اللي انت توطاهـا
يجي يوم وتكون جدار أو أحجار أو غبـار
قبل ربي يحشر الناس ويطلع خفاياهـا
ويجي يوم تمنى تكون غصن فعالم الأشجـار
ويجي يوم تمنى تكونها قبل تمناهـا
=

البدون
لا صآرت الساعه عشر ..
يتعطل الشارع .. ويطفى النور ولا احد يمر
لا صارت الساعه عشر
الكل يأوى للفراش
والكل يحرسه الفراش
في الشارع المعتوه ممنوع السهر
حتى الشجر يسكّر الساعه عشر
انا حزين والحزن مايحتآج احيان لـ عذر
انا حزين ماهو على شان الفراش
ولا على شان الشجر
حزين لاني بشر
احيانا انسانيتك تحرمك من اشياء كثير
لو كنت نحله كان ممكني امر
لو كنت قطعه من صخر
لو كنت اي شيء اي شيء .. الا اني بشر
كاان ممكني امر
حبيبتي .. انا وصلت لمرحله مابعدها الا الجنون
تخيلي من كثر ماودي اشوفك
صار لعيوني عيون
والعذر مايشفي الصدر
العذر ابشع من جروح الكون
انا بدون
مدري بدون ايش والا ايش ناقصني واكون ..
من البشر .. وذو شجون
تدرين وش معنى بدون ؟!
يعني ماحب ومافتخر
تدرين وش معنى بدون ؟!
يعني ماحج وماعتمر
تدرين وش معنى بدون ؟!
ممنوع حتى من السفر
وان قدر الله ومرضت .. لابد اعتذر
لأني بدون
انقاس بالاوراق .. ما انقاس بشجون
شكرآ جزيلا ياخليج العز وشعوب المعزه
ان كنت ماني مواطن انا ضيف واستاهل معزه
قولي لهم حبيبتي .. انا تعبت من الشجون
ومن الورق ومن الارق ومن النفوس
قولي لهم حبيبتي مابي .. عروس ولا فلوس
ابي ليا من مت يعطوني قبر !
=

التوبة
من كل حرف وكل شهوة صبابـه
أستغفر الله واتعوذ من أبليـس
أعوذ باللي آوى عبد وسرابـه
لاجي نهار الحشر خلف امرئ القيـس
يارب يارب الكرم والمهابـه
ياللي لك أعلام الأوادم مناكيـس
جردني من النابيه والسبابـه
ولبسني من دروع هديك متاريـس
تعبت من مسك القلم والكتابـه
والشعر وفتن النسا والأباليـس
والمدح في عزوه وشيخ وقرابـه
واللآء لدعـوات الرضيين والليـس
والحب وماحوله وماله ومابـه
والدمع لاهبت على النسانيـس
والشوق وغفال العقل وانغلابـه
والليل وخطط الدها والجواسيـس
والشهرة وحكي العرب واللبابـه
وزملوق شف ماتعسه عواسيـس
وحصر اسمي فـ شاعر فـ ساحه غرابـه
شعارها فيهم رخوم وملاحيـس
وانا لعطَاش الأوادم سحابـه
ومن خلقتي ماقد وطيت الدنافيـس
اتكي على إرث الاسم بالنيابـه
واقطف خلاصة ماغرسوه الغواريـس
احسبني فايز بالرضا والذرابـه
واثري مثل من يحصر النور في كيـس
اقفي من الله والامل والرضا بـه
واروح ادور من ورا إبليس أحاسيـس
أسهر على فن الكلم والخطابـه
واصبح ولين اللي جمعته حماليـس
قلبي لعزاف الاوادم ربابـه
وراسي لخطوات الشطانه دواعيـس
تقودني نفسي ولاأشعــــر ولا آبـه
مالت عليها عاصيات الهواجيـس
من عنده إن كل الشعور يتشابـه
روّس مع اللي في الدحادر مراويـس
الاثم ماحاكه في خفوق وخفابـه
والخير ماشاعته روس النواميـس
كم شي صار وصار محد(ن) درابـه
وكم غفوة ماكدرتها كوابيـس
ترى مااحد له في رقبتي طلابـه
بس الصراحه من شم الفواعيـس
والرجل اذا مايعتبر في شبابـه
يعيب قبل يشيب ويشيب ويخيـس
ياراجي ارج اللي ماينصك بابـه
لاترجي الوهبات من هيس ابن هيـس
استغفر الله واتتقى عـذابـه
اللي فرقني عن حياة المتاعيـس
من قبل لااعرف الهدى واعنابـه
انا همي والحزن فيس تو فيـس
والحين لله الفضل والانابـه
متعافي ويمشي على زندي التيـس
شريت عقلي في سؤال وإجابـه
أنا أعبد الله والا اعبد الوساويـس؟
لذه خفوقي وانجلايه ضبابـه
سجدات ليل ظالمينه مناعيـس
فـ اجواء مكه والحرم والرحابـه
لا يابعد روما ولندن وباريـس
هذي ديار المصطفى والصحابـه
وهذيتك دار إبليس وعويل إبليـس
=

الحضيض
مالحضيض اللي ملك رووس الاموال
الحضيض مسلم قلبه مبرّد وعينه راقده
من عوام الناس ولا يغاظ ولا يغيض
ومادخل في عالم العالم المتعاقده
بري حالي بري عود تحت هبّاب قيظ
ممحل وقافيه حطّابه اللي بياقده
مايخلي الناس توصل لمرحلة الحضيض
كون تمجيد النفوس الصغار الحاقده
ومايصغر في نظر عيني الكون العريض
مثل نظرات الرفيق البخيص الناقده
ومايقدّر قيمة العافية الا المريض
ومايقدّر قيمة الغالي الا فاقده
=
الخوف
ماتورد البل هكذا يابن أخي
الحب ماهو صدفة شعور وظروف
الحب فن الدرب والجري والضي
وتشوف قدامك ولا كنك تشوف
تستأرض من اللهفه وفي رجا الري
وتطوف أشياء قبل ماكانت تطوف
وعمك يحب وحب عمك ماهو بغي
وهذا البلى لاصرت عاقل ومعروف
مصايبك واجد ولو إنها شوي
وملقوفك يجي عن ثمانين ملقوف
وأنا يابوك أحب وشعوري سخي
شف قلبي مشقق متاهات وحسوف
مالك ومال الحب والجرح والكي
ملئانه الدنيا خيارات وشفوف
غامر بذوق وجرب الشمس والفي
وإن نفت طحت وطيحتك عقبها نوف
تعلم تعايش ظروفك كما هي
ولا تكلف دام منته بمكلوف
ولا ترخص دموعك ولا تجادل العي
ولا تسرق البسمات من وجه مألوف
الطيّب اللي يسخي بذي وبذي
يضحك ولو في صدره رماح وسيوف
والحي ماهو اللي لأجل حاجته حي
الحي من يطفي ضما كل مشغوف
والخوف ماهو بإنك تخاف من شي
الخوف هو الخوف من طاري الخوف
=
الدموع
الدموع اللي أحبسها طوال السنين
كلها في ضحى ذا العيد نزلتها
والله إني جريح ووالله إني حزين
وليت حزني طبيعه كان بدّلتها
مير حزني من الصده وطول الحنين
وخيبة آمالي اللي فيك أملتها
ياموقف علاقتنا مابين وما بين
لاتراجعت منها ولاكملتها
كان مرخصني الله مايرخص ثمين
كان جافي زعل تراك طولتها
عايدوك المسيحيين والمسلمين
وانا روحي على معايدك علّلتها
ياحسافه على الرفقه وحب السنين
حتى كل عام وانت بخير ماقلتها
=
الذيبة
يالله يارب يارحمن
ياعالم سدّي وغيبه
بيديك تدويرة الازمان
ومطلاعه العمر ومغيبه
حتى اللي ماحل ولاحان
تعرف وشهو وتدريبه
ياذروة الجاه والسلطان
والعفو والملك والهيبه
ملوك الانس وملوك الجان
تشفق لمدك وتشفي به
سبحان سبحانك وسبحان
عظمك واسرار اساليبه
تذل امّه من الطغيان
وتقدّر المسلم الشيبه
عليك تبيحة الكتمان
لانها على غيرك معيبه
الارض جردا وانا بردان
والسبع حدد مخاليبه
ومابشع من فراسة الجوعان
وتسحبه من عراقيبه
إلا مرضاك للزعلان
وحضور يشابه الغيبه
البارحة كان ياماكان
ضيفان عز ومعازيبه
شتان لكننا سيان
بالفعل والذكر والطيبه
اقلنا شان لاجا شان
يصرف على قومه من جيبه
والان والان ليت الان
ماجآ ولاجآ بتعذيبه
تقول ماكن حنّا اخوان
كلن عناده مقفي به
بعض الاماني طوال عنان
تجمع الامل بالخيبه
ياليت مانيب ولد فلان
اللي ربوعه تماريبه
ياليتني حارث في بستان
ومسلم بلاشكه وريبه
إن عاش مايعمل إلا احسان
وان مات محدن بداريبه
يالله يامنزّل القرآن
وفاتحته السبع المهيبه
سجلني مع الندم ندمان
واصلح لعبدك عذاريبه
كتاب وان كان لي عنوان
شريف وايامي صعيبه
يمرني العارض الهتان
وترد العرب من مشاريبه
واصد منه وانا عطشان
شين الجموح وقطع صيبه
المرجلة في بعض الاحيان
تودي الرجل في مصيبه
ياجعلني طمعة الشفقان
لو تاكل عظمي الذيبه
لاني مجرب ولي برهان
في كل وادي اغني به
الحاجه اللي ورى الرديان
ابشع من الموت في عيبه
=

السعادة
من اللي يسلفني شعور السعادة
وأهديه عشر سنين من عمري الجاي
لولا التشبّث بالامل والاراده
لقيتني مجنون رسمي وبكّاي
أحس إن بكرة مجرد إعادة
لليوم واللي قبله وهذي دنياي
الالوان واااجد بس كل شي سادة
العيب في الألوان ولا فرؤياي ؟
أنا حزين إن الحزن صار عادة
ياليتني مخطي واعرف وش خطاياي
أهديت للدنيا قصيد وسعادة
لكنها ما رجعتلي هداياي
=

الشوارع
يابوسبا يوم إن قطف الزماليق
انا مع الشيخان فاكك وصارع
كبرت فيوم الريق يدور الريق
وقدمت يوم ان الرخوم اتقارع
لولا البناعم وطموح الشواهيق
ماشفتني وأنا ثقيل اتسارع
علم رديين البخوت المطافيق
أني على تحمل الظلم بارع
ولو ما فوجهي دم وفخاطري ضيق
لقيت لي بيتين في كل شارع
مسامحك يابو الطعون المشانيق
لأن الحقيقة درع والذكر دارع
ولو تفتح صدور الرجال المغاليق
لقيت خلق الله عليها تصارع
والغيث لو فرح عيون المخاليق
أحياناً يبكي عيون المزارع
يابو سبا والحب حب المطاليق
ومدينته مانيب منها اتوارع
أدلها طريق طريق طريق
ولاني انجرحت أشوم عن كل فارع
تدري وش اكثر مايهز المعاليق؟
جرح البوارع من يدين البوارع
لامن غدا أعز صديق صديق
صديقتي وأنا صديق الشوارع
=

الطرقات
في الكبد ليعاتها وفي النفس حاجات
حاجات ماهي برغبات وشهوات
ندم على حزن على ماادري شسمه
اللي يكلمك وتكلمه بسكات
ياودي اصرخ من اللي داخلي حيل
وياودي ماتنبس من الليعه شفات
مزحوم تفكير ومشوّش وبردان
وياخوفي من الغضب والانفعالات
تعارك الشر مع الخير فيني
يأثر على اتخاذي للقرارت
ثاقب وألاحظ تفاصيل التفاصيل
كن البشر عري وعيوني مرايات
أفضال ربي علي واجد وأفضل
أفضال ربي علي الفقر وأنكارة الذات
يامجمل الفقر وأشياءه وروحه
تموت منه تعب وتعيشه ازمات
يعلمك ضعفك وبأن عقلك
هو اللي يميزك عن الحشرات
وتعرف بأن هذا لك وذا لغيرك
ولاتفكر ولاتكسّر حسابات
الفقر مفيد وأشياءه مفيده
مليء قوه قناعه وغايات
يمكن لو أن إنك غني تطغى وتنسى
وتطيش وتطوف الخمس الصلوات
لذلك الحمدلله والثناء له
على الفقر والمصايب والمسرات
يمكن اني فقير بس مانبي تبعي
أجلس ولا أنقاد خلف الاتجاهات
وان مااعجبتني قناعات الزمن هذا
انا أألف لتفكيري قناعات
شاعر ويسكن فمخي ألف شاعر
ماهم بشعار هالوقت التروفات
اللي يقولون مافي الشعر نادر
وان الشعراء نفس المستويات
لو انهم واحد وبتفكير واحد
كان ماشفت ناقد ولامعجب وشمات
الله على هاالكلام ومن يقوله
الله يقطع سياسة هالمجلات
يعني اللي قصيده ملى الدنيا جماهير
مثل اللي يطلق قصده سرة ابيات
لامن سمعت القصيد قلت هذي
سمعتها قبل هذي عشر مرات
يشيل اخر كلام الشطر الاول
ويحطه باخر الثاني وخذ هات
قاف متكرر ولا فكره ولاشي
يبني القصيده على تفكير بنات
وبه نوع ساذج علشان يتميز
يصرخ ويعمل بيدينه حركات
والمرء عدو مايجهل لذلك
هالشعراء يكرهوني انا بالذات
الله يخليني لشعري وأصونه
وأحرق به كبود شعار المسجات
أجذب به أذواق حكام الجزيره
وازرعه في عقول فتيان وفتيات
أركبه جن وأمارسه بجنون
وأشبعه فلسفات وإبتكارات
وأعلم الجيل هذا واللي بعده
جودة الاطاله وفن الاختصارات
ووشلون احرث صخر فكري وأخلي
بيني وبين اقرب منافس مسافات
الشعر في نظرة أغلبهم مصالح
فلوس وشيوخ وبنات ولقاءات
وفي نظرتي الشعر رورح وروح حرة
ماتخضع لشف واشخاص وقياسات
الشعر ماتقشعر له الابدان
ومايسرق من الكلمات الكلمات
تقراه في عيون شاعره وتحسه
يفتح له فجلد يدينك مسامات
ردد قصيدي ياجمهوري وصفق
وعلمهم ان الغلا ماهو خيارات
وتعال نسرح سوى في شي عندي
واخاف لاابكي وتبكيني العبارات
حزين جداً ومتعومس وخايف
أحس كني على مهوى نهايات
حبيبتي اللي أغليها وابيها
راحت وقالت بجي وللحين ماجات
ما اذكر اني مسوي شي لكن
الحب اذا زاد يسبب حزازات
والصبر صبر القلوب البيض وادري
يامصعب الصبر لاقد به محاتات
دمرني الشوق واستنزفني شعور
وتعبت اثبت وجودي داخل اشتات
تمر كل الوجيه بدرب عيني
نفس الملامح ونفس الابتسامات
حبيبتي طاغيه وبشكل طاغي
صديقة الليل واجناب البنايات
من وين ما افتر لاهذا وجهها
على الطرقات وأضواء السيارات
يابري حالي عليها بري حالي
عليها يابري حالي عشر بريات
لأني أحبها فعلاً وجداً
ماهي محبة رفث ولا اتصالات
احس كني أبوها او أخوها
أدرى عليها من العالم مدارات
واللي سواتي يحب وخايف الله
يعرف معنى معانات المعانات
الحزن في بعض الاحيان أزدواجي
وجميل لاصار من تجنيب غلطات
من خلا حاجة لربي عاضها خير
منها واحسن دبلات الدبلات
وانا لابي غيرها ولا التفت له
السيده لا رجعنا للسيادات
جعل امها اتوافق ان جيت اخطبها
تكفون دعواتكم يااهل الدعوات
=

العالم
اليا بكى رجل يبكي حوله العالم
ليت الأماني بشر وأقضي حوايجها
آخر جروح السنه واولها ياسالم
هي هي ياسالم ومنتجها منتجها
الواقع الشرس بكى الشاعر الحالم
ونفخ على شمعته وأغتال واهجها
تصدق احيان احس اني انا الظالم
أحد نفسي على العسرات وأحرجها
أحسب نوض الغلا ترحيب ومسالم
شين الجماله ليا خابت نتايجها
تدري متى الجرح يبطي وقعة ويالم
لاجاك من ناس أنت الي تعالجها
ماينفع انك تكون سنافي ومسالم
ماينفع العالم الآ من يحاججها
على كبار المصايب قلبي معالم
الا الآخيره هذي عجزت ادرّجها
حبيبتي روحت يادمعي الوالم
وياليت من يقضي لنفسي حوايجها
وياليت مابه فوارق بين هالعالم
وأن اللي اتحبها فـ الآخر تزوجها
=
اللوبي
الراس بيت شيوخ والحلم جاسوس
للنفس يقطع من تركها ثواني
خذني وطلعني ولو الهوى كوس
ابا أتنفس شي صافي وهاني
داخل تصادم فكر ومزاحم نفوس
على فتافيت الغوى والغواني
في هاللوبي كل شي ضايع ومعكوس
ماكن في هالكون رب واماني
اثاثه الغامق وتصفيفة الكوس
تدل على ذوق راقي وداني
شفهم وشف كيف الفشل يجعل الروس
اشيا كماليه مابين الاذاني
وشف كيف هذا ثمل ويعثر ويدوس
على مسمى جده الاولاني
وشف كيف هالشايب برغبته محبوس
تحت شعار ان آخر العمر فاني
احس عنده عيله وبنت عروس
تخجل من ابوها كثير وتعاني
وشفت الثنين هناك تراهم جنوس
رجال بس رجال من نوع ثاني
ضحايا نفط وقل طاعه وناموس
والام كانت طيش والاب اناني
وشف هالجمال اللي مدّثر ومحيوس
مثل الكلام اللي بليا معاني
فتاه تعرض جسمها الغض بفلوس
ويبيعها في اليوم عشرين زاني
كل الزوايا طافحه قبح ونجوس
تسبح وفي الركن الاخير المواني
واحد يغني وعنده حثاله جلوس
كأن ما في هالحياة الا اغاني
ياوخز قلبي وخزة الجرح بالموس
ياعالمن ما فيه حلم وتفاني
في هاللوبي ما فيه ريس ومريوس
الكل بايع نفس والكل جاني
والكل عنده عذر واهي ومدروس
لو قلت ليه انت كذا قال اعاني
انا اللي اعاني من القوس للقوس
هذا مهب جوي ولا هو مكاني
بركض وابي يركض معي ألف فانوس
الى صباحات الغلا والتهاني
روّح معي والواقع احيان كابوس
وانا ما احط اللوم على زماني
احمد ربي كل ما دق ناقوس
واعرف حدودي واستحي من كياني
واصمت اذا جا للحكي روس وعسوس
واضحك ولو وجهي من البكي حاني
لو كل شي محسوس بالفعل ملموس؟
طلعت آخر جرح بين المحاني
=
انسان
يارب ياقادر على كل قادر
يامكرم الإنسان على الحيوان
اجعل لي من هبات عفوك مصادر
وارزقني مع العفو نظافة لسان
عبدك واجاهد بك واكافح وابادر
واقاضب الشوشه مع كل شيطان
أوي يالدنيا ويا كل هادر
فناء ياوجدي على كل ماكان
جروحهم ورّيد والدمع صادر
ياصدري اللي كنه باب ابن شرعان
الحال مامن حال والحيل فادر
والنفس صارت من الوساويس نفسان
احس باقي لي ليالي وأغادر
عشانني أنسان ضاقت بي أوطان
إذا شرفهم بإمتلاك النوادر
أنا يكفيني شرف إني أنسان
=
برحل
برحل وبآتي أذا آني بقدر آتي
بس أخاف أرحل ولا عاد أقدر آتي
لان هذا حظّي وهذي صدوفه
يكره أستقراري ويغلي شتاتي
وعاد عقلي كل ماجيت آتشتّت
يحسب شتاتي على قدر أمنياتي
والبلا أن كل ماعقلي تمنّى
ماحصل لا في شتاتي ولا ثباتي
يمكن أن وضعي وضع سيىء ويمكن
ماتحمّل جسمي كبار شهواتي
والدليل أن ودّي ما أرحل وشفني
أربط أشلائي بمحزم ذكرياتي
ياحبيبي ليتني ماكنت أحبّك
لجل أحبّك دبل وأسوّي سواتي
يعني كل شي حطّه فعقلك وحاته
الاّ بخصوص أنّي أحبّك لاتحاتي
لمّني وامسح دموعك وأبتسم لي
وحبّني منّا ورتّب حاجياتي
وأعرف أن ماودّي أتكلّم ولا أبكي
بس دايم دمعي يحرّك سكاتي
شي واحد قبل ما أرحل بقوله
أنت أجمل حظ سيّىء في حياتي
=
حزن النبلاء
الجرح ماهو خاطر شوي ويروق
الجرح حتى لو تشافى يعللك
واذاك متحمس متاهات وطروق
انا تعبت اشد حيلي واحاولك
سماي ما شيّ شمس ورعود وبروق
والريح ماهبت ولايجري الفلك
والقلب ناشف بحر وشقوقه شقوق
وشلون بيكوّن سحاب ويبللك
يا ضامي انا اضما ومتشبع حروق
واذاك ضامي للمواصل انا هلك
هلك ووقف في وجهي الاصل والذوق
والمجتمع والعرف والفقر واهلك
متعومس وحزن النبلاء مرموق
يعني لو احتاج لك ماجيتك اسألك
اللي علي اشكي واعاتبك برفوق
واقولك ودي ماعاد اتأملك
من دورة الايام ياخوك مخنوق
الوقت مشاني من السلك للسلك
ازل خطوه بس ما ازل منطوق
ولو صارت ابحب خشمك واجاملك
يبقى البني ادم مجرد ومخلوق
ملك ولكن في الحقيقه بلا ملك
والناس عوق الناس والدرب مسبوق
تتعب على اشياء فـ الاخر مهي بـ الك
كذاب قايل كل مطرود ملحوق
سنين وانا اطردك وازريت لا اوصلك
كنك تطيش وكني ادور في طوق
كل ما وصلت اخرك يطلعلي اولك
ياليت مافي خاطري شوق وفروق
ماكان حسيت ان انا بس منك الك
الشوق ماهو رعشه وقبضة عروق
وماهو اللي من شينك فعينك يجملك
وماهو شعور يخالج الروح برفوق
ولاهو سحر ولا ادري والله شقول الك
كنه سحابة حلم وتطير بك فوق
وتطير ولا ودك انها تنزلك
الشوق هذا والا انا شوقي البوق
ماقد حصل في شوق هذي ولا تلك
تدري وش اسوي ليا اضناني الشوق؟؟
اسوي بعيوني كذا واتخيلك
واقربك واتوق واتوق واتوق
واكثرك واحلف ماعاد اقللك
واصورك في الموق وتكبر على الموق
وتطيح مع دمعي على ايدي واقبلك
هذا غلاي اللي مع الدم مدقوق
ولا عاد تسأل عن شعوري وازعلك
محبة ماهيب من طارف السوق
لو انك توكل كان والله لاكلك
جيتك حقوق ورحت ماعندي حقوق
وان قلت ما احبك ابجحد مواصلك
احبك الا يا بري حالي وعوق
من كثر ما احبك اخاف اني اقتلك

=
خلوها
خلوها ياهل الشعر واخماس الاسداس
قصيدتي هذي خطيره مثيره
لله وللتاريخ ولكل هالناس
ولـ هالحياة الزايله والمريره
واللي مهوب لذروة الفكر عساس
ينضم لـ اصحاب النفوس الكسيره
الله الاول من قبل لفظ الانفاس
عز وجل من الظنون الصغيره
مامثل مثله مثل ولاله اجناس
يخلق مخلوقه ولايستشيره
اذل له وانصاع له واحني الراس
اللي جعلني ماعبد رب غيره
عساه يكسوني من السندس الباس
في يوم يعرابه الامير و الاميره
شاعر وذنبي غير وسكوتي اجراس
ونفسي على مالله عطاها فقيره
من كثر ما اعطي حب واخلاص واحساس
انا ماعاد اعرف وشلون اصيره
في عقلي الباطن عقيده ونوماس
وفي واقعي خوف وتردد وحيره
هل ياترى ببني على حلمي اساس؟
ام ياترى ببقى على هالوتيره؟
والافلاس ماهو افلاس من حلم الافلاس!
اذاك ماتملك لنفسك بصيره
ماخلق شي الا بقدرن ومقياس
ماشي يغلب شي او يستعيره
اللي خلق خوف وخلق ضيقه وياس
خلق امن وافراح وحب وبريره
لذلك الله لايوليني انجاس
ويكسوني بفضله ومنّه وخيره
الرب اذا تحتاج له صرت نبراس
والانسان اذا تحتاج له صرت اسيره
والناس ناتج ناس استلطفو ناس
ابناء رغبة واستهامه وغيره
لولا التلاطف واللي مابين الاقواس
ماشفت هالعالم شفوحه غفيره
ندور ويدوّر بنا كل هوجاس
ومن اجل ذلك روسنا مستديره
الكل تايه في مصيره ومحتاس
وماهوب هو اللي يحدد مصيره
فياليت ماتنسى الذواليق غراس
وماينسى مجرى المياه وخريره
اعلّم اللي عاث من بعد ماجاس
ترى الجهل راس الامور الشريره
وين الملوك اللي على اقباب الافراس
راحو وخلو المغريات الكبيره
هالارض ياللي برجل الناس تنداس
بواقي ابن دواد وابن المغيره
الله يلعن كل مشرك وخناس
والله يلعن هالحياه القصيره
صغيّر الادراك وصغيّر الباس
يحسب كل الناس مثله صغيره
ياقلب برّد كل ماهب نسناس
مادام هاليمنى نديّه وجديره
يفداك من رزقه قتات وتمراس
لولا رئتينه ماطلّع زفيره
شفاه من طرد الملذات يباس
وهو على عد الرواة وغديره
حديثه فما قال حمزه فـ عباس
ماحدّث المسلم عن ابو هريره
العمر فرحه وحده وعشرة اتعاس
ومن لا يجيره خالقه من يجيره؟
ومن عاش شاف وكل غبّه بغطاس
والصدق خيره مذخرته الذخيره
كل ما اكتشفت من الاصاحيب بلاس
اقول يالله جعل فـ الامر خيره
خيره تعرف ان به من اصحابك اخساس
خيره ولكن ياعساها الاخيره
اقسى جروح الناس تغلبه بنعاس
مايذبح الانسان الا ضميره
بعض البشر مثل ابتسامات الاعراس
على كثر ماهي مثيره ضريره
وحيد وماعندك من الناس جلاس
اخير من شر الكلام وسعيره
والكل مايخلو من اخباث وادناس
في كل نفس هناك حاجه xxxxه
فـ من قبل لاسوي مشاكل مع الناس
عندي مع نفسي مشاكل كثيره

=
زجاجة عطر
الناس مع الناس قضّاية وطر
والكل قيمة ما يجيه من إحتياج
وأول سطر ما هو مثل آخر سطر
الأول أبدأ لكن الآخر نتاج
والماء من يدينك حلو لو هو قطر
ونهراً على يد ماهي بيدّك هماج
وكل شيء ممكن يسبّب لك خطر!!
لمآ اتعامل مع مبادئك بمزاج
والانثى للرجّال زجاجة عطر
واحد يبي العطر واحد يبي الزجاج
والشعر إذا ما شدّك من أول شطر؟
كلام لا يكنى ولا فيه إزدواج
الآدمي على الأضاديد إنفطر
لذلك الله سنّ للناس الزواج
من أجمل الاشياء في الدنيا المطر
ومن أبشع الأشياء في الدنيا العجاج
=
صداقه
الحزن مايقرأ علشان يكتب
يسولفه وجه الحزين بطلاقه
تلقاه متأثر ولاهو مرتب
ومن وقت ما راح لصالون الحلاقه
يغلي الصباح وما يداني المغرب
وشريد والليل يتمنى فراقه
يا الحزن تاكل في خفوقي وتشرب
بس أنك ما قدرت ملح الرفاقة
حقي علي أنا مقصّر ومذنب
رشيق حس وأمنياتي معاقه
شاعر وحالم وأحسن الظن وأحب
وأقبل سكاكين الغرام برواقه
أحب من أحساس ومن روح ومن قلب
في وقت فيه الحب لبس وأناقه
وعلى الرجل لا فيه لاأقسى ولاأصعب
يعمل حماقه يعرف أنها حماقه
يا أعذب من أعذب شيء في الكون وأعذب
من الصباح اللي على درب ناقه
أنا أتعذب فعلاً أنا أتعذب
من أنتشاقي للهوى وأختناقه
أنا أحبك صدق وإذا بتلعب
أرجوك أنا ما عاد عندي لياقه
حدد مصيري معك ولا فجنّب
راحت فراق ولامواصل محاقه
بلاش غش وزيف ومخادع وكذب
يا أني أحبك يا بلا هالعلاقه
صداقة ممكنها تحول إلى حب
الحب ما ظني يتحول صداقه
=
صديقي الرجل
صديقي الرجل والدنيا لها دوره
تجمّع الناس وفـ الغالب تفرقها
والناس بأخبار سو الناس مسعوره
وفالطيب بكما ذكر وآذانها صقها
وحنّا فضاءاتنا ضحله ومحصوره
نبي نطلع من السطحيه اعمقها
افضالنا ودنا انها دوم مذكوره
وعيوبنا مانحب احد يتطرقها
كأننا رعاع منهيه ومأموره
نحفظ شعارات لكن مانطبقها
جهال في عالم الانسان وشعوره
نستحقر اللي شنباته يحلقها
نقلد آبائنا بالصوت والصوره
وحتى خرافاتهم لازم نصدقها
نحب نحزن ولو الاوضاع مسروره
نعمل من الحزن غبه لجل نغرقها
يا مجتماعاتنا هشه ومغموره؟
يا ان لنا اعماق ما نعرف حقايقها
صديقي الرجل لا فورة ولا ثوره
الاحلام ماكلّها نقدر نحققها
فالعاصفه اذكر البستان وزهوره
وان ماعطاك الزمن بسماتك اسرقها
وان انشدوا كيف حالك ؟ قول مستوره
لو ان الاوضاع يوميا تشققها
النفس اذا ماهي بشرهه ومغموره
يطقها الشح وتروح انت تلحقها
صديقي الرجل واطراف الناس عوره
فما بالك بجرحها ولا مزارقها
اختارها خيرة المبلي لدكتوره
واتعب على عروق اهلها اللي تلاحقها
وركز على دينها والعقل وحضوره
وشفها وحاول تعرف اللي ترافقها
الزين غسل اليدين ولذته فوره
عليك باخلاقها اللي ماتخلّقها
وان سهل الله وزان الحلم باموره
الغاربه في التعامل لا تشرقها
كن مبتسم مقتنع بالله ومقدوره
وشوف احلى مافيها من اشياء واعشقها
اشفق لها شفقة الشاعر لجمهوره
توقع حروفها من قبل تنطقها
وان ازعلك شي خل عنادك وجوره
اهمس في اذنها عتب وانته معانقها
العمر قصير والاعمار معموره
ماتستحق انك تضيق واتضايقها
وان شفت مايظهر الرجال عن طوره
لاتكسر في نفسها ولا تعلقها
سامحها واقطع طريق الشر وشروره
او ردها لبيت شايبها وطلقها
مايضمحل الرجل في عيون غندوره
الا لاعدد خطاياها وخانقها
ومايستزيد الرجل في عيون غندوره؟
الا لاطوف خطاياها وصادقها
=
صديقي المسكين
صديقي المسكين انا احبك
وسعيد بالمرة لاني صديقك
لطالما حسستني اني انسان
ولطالما حسستك اني رفيقك
اللي جميع بيني وبينك روابط
نقطة تلاقي في طريقي وطريقك
انت تمنى لي الزيادة على الخير
وانا اتواضع لك وابرّك واطيقك
امشي معك واجلس على الارض عندك
واتعاطا افقر شاي صبّه ابريقك
بالرغم من كم الفوراق والاعراق
كنك شقيقي وانا كني شقيقك

=

علم النفس
في فن علم النفس وانماط الحياه
مصيبتك طلّع وراها فايده
لاينتثر فكرك على كذا اتجاه
الخصخصه فن العقول الرايده
وان ساد من حولك شعور الاشتباه
خذ لشعورك منطقه محايده
الثقه سقف العقل والناقص ذكاه
من حسسك بأن فيه حاجه زايده
والابداع ماهو لعب شد الانتباه
على حساب الغاء فكره سايده
والضيق ضيق الافق واكظام الشفاه
وفهم الحياه على انها مزايده
افضل وسيله للسعاده والنجاه
سهله على الراغب ولا هي كايده
توحد الله صدق وتقيم الصلاه
وجعل الفواحش عن حدودك نايده
وتكف يدك وتحمد الله على الغناه
وتخشّر هنودك معك في المايده
ولاتخاوي لاشيوخ ولا رعاه
خاو اصدقا تفكيرك وفرايده
والشيخ من تواضعه يسبق عطاه
يتعودون الناس من عوايده
والحب ذروة كل شي ومنتهاه
ومحلا من وضوحه سوى مكايده
يبكي الرجال ويبحّث خفاه
ويعلمه شرح الحظوظ البايده
واللي يحب احد(ن) ماهوب في مستواه
يبطي وعينه بالمدامع جايده
ياوجد حال الشاعر ويا امه واباه
وجود من هاوش لأخوه وصايده
اللي اتمنى اعيش واتوفى معاه
حتى فعيده ماقدرت اعايده
الحزن طاقه للدعاة وللطغاه
وانا طلعت من الجروح بفايده
ان لم تزد شيئا ًعلى هذه الحياه
فتأكد انك انت حاجه زايده

=
في انتظارك
كل حاجه يانبيله في انتظارك
الوطن والناس وآنا في انتظارك
والطريق العام والباب الرئيسي .. والممر وقبضه السلم ..
ودارك ..؟
كل أبونا .. يانبيله فـ انتظارك ..
لو تشوفيني شلون أمشي ويديني فـ جيبي
أنا .. وأحزاني وطيبي .. كان ماخذيتي قرارك
كان مارحتي ولاقلتي ترا .. منت بحبيبي
ياخسارة قلبي المظلوم ولا .. ياإنتصارك
رحتي وخذتي معاك ابسط تفاصيل الحياة
يامزعلة البنات ..
وش لي بباقي البنات
انا ميت فيك .. ايش ميت فيك ؟
انتي فيك حتي الموت .. مات
ياجنونك ... ياأنتشارك
مري فـ شارعك الاول يالغلا الاول وطوفي
بس شوفي ..
من وقف على عيونه في انتظارك
من بعد ماخنتي وخانو كثير احباب يوفي
هم هم ...
رابطة جمهورك المتعصب لـ طلة نهارك
انا .. وطيور القفص .. والباب .. واشجارك .. وجارك
انتي ام الحسن وام العاطفه واحنا صغارك
فـ لاتلومينا ليا منا وقفنا فـ انتظارك ..
اطغي اطغي . . خلي الغابات تتسلف خضارك
بس تترك اصفرارك ..
لـ ابتسامات المجامل ولـ وقارك
واتركي لعشاقك الموتى xxxxك
او بالاحرى .. احمرارك
لاتلومينا مجانينك نحبك لاطغيتي
لا زعلتي .. لا حكيتي ..
انتي مسكينه ومظلومه ومعذوره ليا منك نسيتي
لانك انتي اللي فقط...
ماشفتي نفسك لا حكيتي
ولانك انتي اللي فقط
ماشفتي نفسك لا مشيتي
يادمارك
ياوقوف العالم الثالث علي شرفة زرارك
مادريتي ؟
طيب ادري يانبيله كانك اليا الحين فعلاً مادريتي ؟
انتي اكبر مشكله تواجه الشعب الكويتي
انتي مثل الظلم والا جحاف بس انتي لئيمه
هم طبيعتهم عدائيين بس انتي رحيمه
مابدر منك جريمه
انتي بالفطره بدون سلاح ومقاتل جريمه
وانا بالفطره احبك ياعظيمه ..
بذبوللك .. وازدهارك .. وانصهارك
يانبيله انا حالياً ترى ماني سعيد
ماعرف للعيد يوم
وماعرف لليوم .. عيد
غايب وروحي جوارك
انقذيني كل ماوزني نقص .. حبك يزيد
انقذيني صرت اكلم نفسي ونفسي .. تعيد
كنا اول فـ نتظارك انا .. وطيور والقفص .. والباب .. واشجارك.. وجارك
كلهم راحو وملوا.. كلهم راحوا وخلوني لحالي .. فـ نتظارك
انا حاليا وحيد ..
انا حاليا معيد ..
لا مزيد .. ولا جديد
الا اني اسولف مع الاخ انتظارك
عند دارك ..
علي كرسي انتظارك ..
اجلس انا .. وانتظارك
في انتظاارك
=
كل عام
جمرني ابدفى من التجمير
وبفرح ولو النفس نقاده
يا شهر تسعة جعل ما بك ضير
بك يوم ميعادي بميعاده
جبه وجبني صب ذايب مير
معاه خاتم شوق وقلاده
ووجه رسايل دعوة وتحذير
لأشياءنا إلي غير معتاده
لأحلامنا الواجد عن التحرير
وقصة سجين يحب جلاده
ووسائل التشويق والتحذير
والشعر بوصوله وبأبعاده
والغيم وزخات المطر والطير
وبخار فم البردة وقناده
وسيد جنيد وسيده كارتير
وبكلات ليل يشقر اسواده
والقبعة والمعطف الحرير
والنادلة والقهوة الساده
والمرحباه اللي لها تخدير
وقلم ودفتر سلك ووساده
والنمل والنسناس والنوير
وأبو علي واجداد اجداده
وابو عمر والسايس الفقير
وجنايني الشتلات ابو غاده
والصبر والفراش والتقدير
وبنات كل الحي وأولاده
في شارعه يتجمعون عصير
للتهنئة في عيد ميلاده
ولا خلص التصفيق والتصفير
من كل مجموعة طلع قاده
وقالوا رجاءا مانبي تأخير
رددوا ورانا بذوق وإجاده
مع بعض كل عام وانت بخير
يا أغلا البشر يا سيد الساده
هذا وسامحنا على التقصير
والله يزود في عمرك أعياده
وانا اللي أحبك محبة غير
من قلبي ومن فوده أفواده
كل عام وانت بخير وانا بخير
كل عام وانا أحبك زياده
وكل عام وانا كافح التفكير
واحبك بإصرار واراده
وكل عام وأنا أقاوم التغيير
وكل عام ولا انت على العاده
وكل عام ودموعي عليك تحير
وهذي السنة بالذات هداده
وكل عام تكبر به ترد صغير
كأنك تسوي لوجهك إعاده
يا كبدي إلي معك كبد بعير
مرددن غاربه لشداده
ويا حب قلبي لقلبك الشرير
الأبيض اللي عناده عناده
سياسة التوطين والتهجير
ما خلت الفقير في بلاده
والله وكبرنا والأماني بير
مصداره يشابه لميراده
سبعة وعشرينك عساها تصير
ميه على عز وعلى عباده
يا حبي الأول ويا الأخير
اللي قديمه ورث أجداده
كل عام وأنت بخير وأنا بخير
وآشيب وانا أحبك زياده
=
ما هو بودي
يارب اجرني من الدنيا وبلاويها
ومن شوفتي للعما .. اللي يقدي مقدي
ومن شهوة المغريات وما يواليها
ومن اني افقد شعوري وأوصل لحدي
ياقطع كبدي عليها من عراويها
اللي كفرت في غلاي وبيحت سدي
احبها احيان واحياناً ما أدانيها
واموت فيها دبل لاوقفو ضدي
العالم اللي مسارحها مضاويها
اللي ماهم بكفولي وماهم بقدي
الموت لاصار حاميها حراميها
ماعاد تدري من يجيب ومن يودي
محبوبتي يا أول ادروبي وتاليها
ويش آآخر من الكلام ويش بابدي
انا رجل لابدا الاشياء ينهيها
ولا أدو عشاشيق كذب الليل مايدي
لو كل حاجه على بالي بسويها
ماكان شرفت اسم خالي واسم جدي
تعلمي مني وروحي وقوليها
ولاجاك مني الكلام الصادق استدي
كم حاجة ماجت فـ يدي وانا أبيها
وكم حاجة مالي ابها وجات في يدي
صحيح لو تخرب الدنيا بمن فيها
ماتذرف دموع عيني من على خدي
ماتذرف دموع عيني من محانيها
الا اني اجبر على شي ماهو بودي
=
مرحبا مليون
تقول لي مرحبا مليون يا بردك
أنا حسبتك بتأخذني من أحضاني
شكراً على حضورك وشكراً على وردك
وشكراً على كل شيء إلا على أحزاني
أحلامي أكبر من أحلامك ومن وجدك
لذلك أعاني لذلك أعاني
لو إن مشاعرك موقوته على وعدك
يمدّيه جاها من الإجرام ما جاني
تجرحني آسفك تذبحني ما هو بقصدّك
ياليتك تشوف وش يصير فـ أشجاني
أكرهك واشوف نفسي فيك وأفتقدك
كل شي فيني على مافيك وصّاني
مدري وش اللي خذاني منّي لـ عندك
به شيء ودّاني وبه شيء بقّاني
أنا رجلين في قربك وفي بعدك
سافر معك الأوليّ وانتظرك الثاني
=
معقده
معقده لأنها ماتغازل
ولأنها تؤمن بجدول عوازل
ولأنها تخاف ربي وأهلها
ولأن ماهي سهم طالع ونازل
إنسانه تحس إنها شي غالي
وعن هالقناعه مستحيل إتنازل
تنئى بإسمها عن كلام الشماميت
وعن الملاحق والقصص والمهازل
ياحبني للي مثلها وللي
تقدر تغازل بس ترفض تغازل
=

نفسي
البارحه سافرت نفسي الى نفسي
ولقيت اشياء واجد كنت فاقدها
طفولتي يومني ماكنت اعرف اقسي
واسماء واجد لنآس الوقت بعدّها
وتمردي واغنياتي وطيشي وحدسي
واول حبيبه ابيضها واسودها
مدري تذكرني الحين اوني منسي
او تحسب اني بكل اشعاري اقصدها
بس الاكيد انها شافتني بصور عرسي
الشهره احيان تجرحها وتسعدها
ياليت بكراي ياخذني الى امسي
وياليت الاشياء لا راحت نجددها
انا اعذر الانبساط اليا جفا نفسي
الاشياء تفقد غلاها من تعددها
=

يا أنيقة
يا أنيقه آسف بشده على هالحوسه
غرفتي تشبه كثير أوضاعي المحيوسه
ما توقعتك أبد بتجين فاجأتيني
عالعموم الله يحيّي الطلّه المحروسه
وقّفي لحظات بين عيوني التعبانه
لين أرتّب لك أريكة قلبي المشموسه
واجلسي بين الزراير والحشا الافريقي
وائذني للبكي .. بيذاكر معاكِ دروسه
شاعرك .. فوضاه علّمته يرتّب حبّك
أنتي .. ثمّ الحزن .. ثمّ دموعه المحبوسه
والدّموع اللي على وصلي ووصلك تنزل
ترفع بنزولها أعلامنا المنكوسه
هذا إنتي ماني مصدّق .. ولا ني مكذّب
آه من برد الشتا ورياحه المتروسه
وايه حنّا ناس غير الناس يا حوريّه
روسنا ما هيب لضعاف البشر مريوسه
لا افترقنا نبتسم وليا التقينا نبكي
ويا فديت جنوننا واشياءنا المعكوسه
مرحبا .. ترحيبة البدو العزيب الرحّل
بالمطر .. لاوّل هشيم الماحله المعبوسه
صح هذا انتي وهذا عطرك السمياكي
وهذي بوهة وجهك اللي بالضحى محموسه
وهذي ربطة شعرك البيضا .. وذي خصلاته
كنّها في زيت زيتون الشفق مغموسه
ما تغيرتي وهذا المعطف العنّابي
وهذي ساعة يدّك المحظوظه المنحوسه
لا هي اللي طالت أصابعك وتشابكها
ولا هي اللي قريبه من عاتقك وتبوسه
وهذي مشيتك اللي من صغرك ما غيّرتيها
هالبشر يخجل يضر القاع ولاّ يدوسه
الجمادات الرذاذ .. تهمس لا مرّيتي
مرحبا يالناعس المحشومه الطاووسه
هذا انتي ماني مصدق ولاني مكذب
لا تلومين الحواس الشرّد المهووسه
كل ما غنن لي الغيّد بصوت مواصل
شلّها قلبي وركّبها على منكوسه
صورةٍ في البال لك كم عام تتخيّلها
أقرب احياناً من المحسوسه الملموسه
وانتي لو ما كنتي فيدّي ولا كنتي لي
لحظتك عن عام .. كل ليله مع عروسه
لانّك الأفخم إسم .. والأبسط انسانيّه
ولانّك الوجه التقي .. والطيبه المغروسه
ولانّي أحبك محبة عمق .. ما هي نزوه
أسمى من حب الجسد .. واهل الهوى ونجوسه
يا أنيقه .. آسف بشدّه على هالحوسه
لهجتي تشبه كثير أوضاعي المحيوسه
ما سألتك ليه جيتيني .. ولا ضيّفتك
ما ابي أخرّب على جو الوصل وطقوسه
ليه جيتي أسألك .. وانا اعرف وش جابك
طاب شجر الغاب والحطّاب قرّب فوسه
لا تقولين اني أرخصتك .. وانا ما ارخصتك
ولا تقولين اشتراك المشتري بفلوسه
ولا تقولين ان هالمره .. هي آخر مره
اتركي لي حلم بعد احلامي الميئوسه
انا شاعر .. حلمه اللي سوّا منّه شاعر
الذهب والعالم الجديد .. دم ضروسه
يا أنيقه .. لو خذوك وسافروا بك عني
الارض صدري .. والسفر من قوسه ليا قوسه
ليت صيت الجد ما ينفع سخيف احفاده
وليتها هالحين وان الكل شارب موسه
وليت .. نقطه نقطه نقطه نقطه نقطه
ما ابي أغلط في الزمن والعالم المنفوسه
ما اعرف شـ اقول .. ولا اعرف ايش اسوّي
الحزن .. طلّت من ابواب الليالي روسه
انسي كل اللي حصل هاللحظة وضمّيني
يا خسارة عمري اللي راح ويا ناموسه
والله ان امه دعت له عند باب الكعبه
واحدٍ حطّك في بيته يالغلا عروسه
=
يجيب السفر
يجيب السفر طآريك يآحي ذا الطاري
وأنا بين تغميض العيون ومدامعها
غريب السفر والأغرب إحساسه الناري
ياكم ناس فرقها وياكم ناس جمعها
فـ على الرغم من كمية الكبت الإجباري
يبين شعور النآس لما توآدعها
وانا لا بكيت البكي صدقي وإصراري
أحس إني انظف خلق ربي وأروعهآ
ترى الشآعر ليا حب ينجن ويمآري
مثل من معه ثروه ويبغى يوزعها
أحبك وإذا ماكنت داري انا داري
أنا كل يوم اقولها لو ماتسمعها
حبيبي .. حبيبي للوفآء بايع وشاري
تخون النفوس مالقت شي يمنعهآ
هداياي .. كتبي .. بآقي أغراضي .. أشعاري
إذا انّا افترقنا طآلبك لاتقطعها
تبرع بها لو ما أنت راغب ولاضاري
لعل وعسى تلقى لها ناس تنفعها

ابدااااااااااااااااااااااااااااااااااااااااع يا اميره

بصراحه شاعري المفضل

لاعدمتك ولا عدمت مشاركاتك

صحت اليدين ونبض القلب ودااام القلم

تحياااتي

لله ما تحرمش ياااااااااااااااااااااااارب

رووووووووووووووووووووووووووعه رووووووووووووووووووووووووعه
تحياتي لك

ابداااااااااع ويعطيك الف عافيه يالغلا

تقبلي مروري

ضحكهاا

مررة ابداااع

وصدق من سماه ((افلاطون الشعر)) ا

مشكووورة اختي اميره الورد ع ذائقتك الرائعه

لا خلا ولا عدم

قموورة

اشكركم جميعا على مروركم ولاهنتووو

اميرة الورد

تدري وش اسوي ليا اضناني الشوق؟؟
اسوي بعيوني كذا واتخيلك
واقربك واتوق واتوق واتوق
واكثرك واحلف ماعاد اقللك

يعطيك الف الف الف عافيه

موضوووع قمه قمه قمه بالرووووعه
حدي نظر

يالبيييييييييييه

الله يجعلني فدووه

كل قصيده اروع من الثانيه

تجنن تجننن تجنن

مشكووووره

حدي نظر وصفوقه

اشكركم على مروركم

اميرة الورد

ناااااااااايس
يعطيك الف عافيه

» قصيدة الشاعر فهد المساعد اخر دروبي
» موسوعة مواقع سيارات
» من أروع قصائد شكسبير
» قصائد وابيات في عزة النفس
» غلا المعيشة - الشاعر صالح بن عزيز