انتي امي شلتي همــي سجل/ي احســاســك .,,

عيوني تباكا كنها مارد المياح
تصب العباير عبرةً ترّدف العبره

على أمي عسى مجري المباكير والأرياح
يعافي بدنها بيده الأمر والدبره

على صدرها بشويش يامشرط الجراح
لاصار إنه يتـعـِب جسمها غزة الإبره

يادكتور بيدك روح ماهي مثل الأرواح
محاكيك ماعنده جلاده .. ولا صِبّره

ترى وده إنـّـه قبل ماتجرح أمه راح
على المقبره من ساعته ويـحفِـر قبره

عساني فدى ماطا تعبها وهي ترتاح
وجعلني ما ذوق أفراق ذا الصوت والنبره

غدى بيتها من بعدها كن فيه أشباح
خواطر هلـّـّه مكسورتن به ومنجبـّره

عسى الله يردش فيه وتعـِمـّـه الأفراح
ويرّجع على خبري و أنا أرّجع على خـُبـّره

وعسى اللي مابر بوالدينه وقام وطاح
على شانهم بين العرب ينقـّـصِـر شـِـبره

ما ألوم المـِفارِق لا أشتحن والجريح إن صاح
ولا قول ياصُغره عليها وياكبره

أقول إن عيوني دمعها مارد المياح
تصب العباير عبرةً من ورى عبره

يارب اسالك العافيه لامي
وان تمتعها بالصحه وتمتعنا بشفائها